जाट रे जाट

अरै ताऊ, ले..ल्ली ना एक और जान,तेरी खाप ने ,
पड़गी होगी ठंडक थारे सरपंचों के कलेज्जे में।
नाम रौशन कर दिया तैन्ने हरियाण्णे का ।
यूँ कहै... गोत्तर में ब्याह कोन्या ना होण देगा,
अरै मेरे जाट ताऊ, या... तो बता…; गोत्तर बणाये किस ने ,वो तेरे सुप्न्ये में आया था के, यूँ कहने को, के गोत्तर वाले सब भाई-बहन हों…उनका ब्याह ना होन दियो। अरै ताऊ, तैने तो धरम को भी भरम में डाल दिया ,अर नेता क्यूँकर मुहं दिखायेंगे अब। बस , तू शर्म ना करियो ,जाट ही रहियो आदमी ना बण जईयो,आदमी बण ग्या तो दिमाग चाल्लेगा, अर दिमाग चला तो "ताई" भी बहन नजर आओगी। सोच ले ताई बहन नजर आगी तो फेर के करेगा । “ जाट रे जाट कै दूनी आठ, जाट बोला सोलैह दूनी आठ" वाली कहावत सुणी होगी तैने, इशे सही करने की सोच। पंचायत, न्याय करने को करें ,अन्याय को नहीं।